Akuerdonan di e konsulta gubernamental entre Bijleveld i e islanan pa 2009 i 2010.
Djaweps, dia 20 di novèmber, sekretario di estado Bijleveld (Asuntunan Internoor i Relashonnan di Reino) a hiba konsulta gubernamental ku gobernantenan di Boneiru, Sint-Eustatius i Saba. E konsulta aki tabata den kuadro di próksimo kambionan estatal den Reino, komo konsekuensha di lokual e islanan ya menshoná lo bai forma parti di e sistema gubernamental hulandes. Komo preparashon pa e echo akí a yega na akuerdo riba interpretashon i e forma ku e status nobo lo tin, e moda ku Hulanda lo tuma riba dje su responsabilidat for di e momento ei, ademas e medidanan konkreto ku lo tuma na kaminda pa e status nobo. Al respekto lo pone énfasis riba partikularmente medidanan konkreto ku por tuma for di añanan 2009 i 2010 pa mehorá sosiedat. Lo duna prioridat na mehora riba tereno di enseñansa, hubentut i famia, seguridat i salubridat públiko.
Riba tereno di enseñansa lo ehekutá un plan di akshon na 2009 i 2010 pa elevá kalidat di enseñansa. Lo hasi un inventario di buki di skol i material eskolar ku mester pone disponibel, pero tambe di previshonnan nesesario manera bùs pa transporte di mucha di skol i problemanan urgente riba tereno di vivienda. Pa mas tardá dia 1 di yanüari 2009 lo presentá e islanan un plan pa finansiamentu di estudio pa studiantenan di e tres islanan.
Tambe lo pèrkurá riba tereno di salubridat públiko pa 24 ora pa dia, 7 dia di siman tin transporte disponibel pa hende malu den kasonan agudo. Lo lanta ademas na 2009 un Ofisina di Kuido ku, na kaminda pa introdukshon di un seguro di enfermedat pa e islanan akí, gradualmente lo tuma over di e aktual instanshanan e finansiamentu di kuido.
A kumbiní ku na kada un di e tres islanan lo bini un Sentro pa Hubentut i Famia pa ehekutá e maneho di hubentut i famia. Punto di salida di e asistensia ku lo duna hubentut ta pa hóbennnan keda na e isla. Pa tal fin lo remplasá na Boneiru e kas di hóben (Stichting Zuster Maria Höppner), i na 2009 i 2010 lo komponé un tim di asistente sosial.
Siguiendo ehèmpel di e aktual destakamento eksitoso di personal di Koninklijke Marechaussee na Boneiru, Sint-Eustatius i Saba, Hulanda lo kontinuá ku esei na 2009 i 2010. Ademas lo duna na 2009 prioridat na introdukshon di un “meldkamer”, esta un punto komun sentral pa tur e servisionan di asistensia, kaminda ta risibí i duna siguimentu na kasonan ku mèldu na e punto sentral, ademas lo mehorá e sèlnan na warda di polis i desaroyá i entrená personal di polis. Hulanda lo pone e aña akí mes, esta 2008, 1 mion euro èkstra disponibel pa polis na e tres islanan, entre otro, pa nan haña mihó ekipo i medionan di transporte.

 

Gobiernu ta informa tokante di siman BES.
Tres dia largu di e siman di islanan BES na Hulanda ta tras di lomba. Riba e di dos dia ku tabata djamars 18 di novèmber a toka turno na e Ministerionan di SZW, esta asuntunan sosial, Finansa i Asuntunan ekonómiko pa nan deliberashon ku e islanan BES. Djarason 19 di novèmber a toka turno na e Ministerionan di Enseñansa, Salubridat Públiko i Spòrt i tambe Tráfiko i Komunikashon pa nan deliberashon ku islanan BES. Riba djarason a toka tambe e tema di posishon hurídiko di empleadonan públiko.
E deliberashonnan ku Ministerio di SZW, esta asuntunan sosial a tuma den un esfera di hopi interkambionan pisá riba e puntonan di salida ku mester konta pa penshun di behes, ònderstant i otro derechinan sosial ku ta eksistí den e sistema Hulandes i ku mester konta tambe pa e islanan BES. Mester indiká ku akinan a dal stapnan mas konkreto den direkshon di e pakete sosial i kontenido di e pakete sosial ku lo bai konta pa e islanan BES pero ku ainda no a yega na e konklushon i kalkulashonnan final pa loke ta trata e diferente komponentenan di e pakete sosial. Bou di e deliberashonnan ku Ministerio di Finansa a atendé e biaha aki e konklushonnan final tokante di introdukshon di Dòler komo moneda ku lo keda ofisialmente introdusí riba e islanan BES den struktura estatal nobo. Tambe a atendé ku struktura i supervishon di e sektor finansiero. Bou di Ministerio di asuntunan Ekonómiko a atendé tópikonan manera telekomunikashon, ‘ijkwezen’, pòst, kámara di komersio i ofisina sentral di statistiknan.
Djarason 19/11 a toka turno na enseñansa, salubridat públiko i spòrt, tráfiko i komunikashon i finalmente posishon hurídiko di empleadonan públiko. Pa loke ta trata enseñansa i salubridat públiko mester bisa ku bou di tur dos Ministerionan a atendé un pakete grandi di akshonnan konkreto ku ya kaba tin medionan finansiero reservá pa nan pa asina kuminsá rápidamente ku mehorashonnan drástiko di tur dos e áreanan sosial aki di e islanan BES. Di enseñansa por bisa ku e rapòrt di inspekshon di enseñansa ku a sali hopi desastroso pa enseñansa su nivel aktual a sirbi si inmediatamente pa di un forma di urgensia hopi haltu Hulanda kuminsá ku su akshonnan pa kuminsá ku mehorashon di e situashon aktual den enseñansa. Tur akshon lo tuma lugá den koperashon estrecho ku Boneiru, Statia i Saba, esaki basá tambe riba e echo ku tur e tres islanan ta rekonosé e situashon di e situashon aktual den enseñansa i e urgensia pa trese e kambionan.
Pa loke ta trata tráfiko i komunikashon mester bisa ku akshonnan konkreto i ku medionan finansiero ya reservá lo bai tuma lugá riba tereno di mehorashon di infrastruktura di airopuerto di Boneiru. Tambe lo tin akshonnan konkreto pa trese solushon riba tèrmino korto pa asuntu di awa sushi di barku i avionnan i tambe temporalmente pa loke ta trata awa sushi di algun hotèlnan. Tin atenshon konkreto pa situashon di wafnan di Boneiru i ya a akordá un estudio pa por determiná sitio adekuá di un struktura di waf nobo pa karga.
Finalmente pa klousura e dia di ayera a deliberá ampliamente tokante di posishon hurídiko di empleadonan públiko. Entre otro a atendé asuntu di penshun di empleadonan públiko i kua entidat na lugá di APNA lo atendé ku penshun den struktura estatal nobo. Gobièrnu di akinan kier sigurá ku lo duna informashon amplio tokante di tur tópiko den transkurso di e dianan despues di e siman di islanan BES.

 

Fineb tin su propio sistema outomatisa di studiante.
Siman pasá Djárason tabata pa “FINEB”(Fundashon Finansiamentu Estudio di Bonaire) un dia históriko, na momentu ku FINEB, ku gran satisfakshon a demonstrá na Diputado Maritsa Silberie i demas invitadonan ku ta traha den enseñansa, lansamentu di su sistema úniko i outomatisá di studiante, netamente traha pa FINEB.
Idra Mauricio, direktora di FINEB, a mustra e nesesidat grandi ku tabata eksistí pa un sistema digitalisá, teniendo na kuenta kon rápido FINEB a desaroyá su mes den apénas 4 aña di tempu. Flamingo ICT tabatin enkargo pa diseñá e sistema digitalisá i a kumpli eksaktamente ku e nesesidat di FINEB, diseñando un sistema dirigí, sin duda, riba e deseonan stipulá.
Segun sra. Mauricio, FINEB a dal su promé stap ku e sistema digital, kaminda ku no solamente por haña òf produsí tur sorto di rapòrtnan nesesario efisientemente i den tempu rèkort , pero tambe informashonnan di kada studiante i nan status.
Hasta e guianan pafó di Bonaire tambe por trese kambionan via e sistema. Sra. Mauricio ta invitá tur interesado pa subi wèpsait di FINEB, esta www.fineb.org i “log in” riba e sistema òf komuniká libremente via e-mail na: info@fineb.org.
Riccardo Vos, direktor general di Flamingo ICT, a duna un demonstrashon hopi interesante i komprendibel pa tur presente di e sistema digitalisá diseñá dor di su eksperto Wilfried Hoppe.

 

BIA n.v. lo kuminsa kobra service charge.
Entrante 1 di desèmber 2008, Bonaire International Airport N.V. lo kuminsa kobra kada pasahero ku ta saliendo for di Boneiru un service charge. E service charge lo kosta Ang 3,- i ta bini riba e airport tax i e security charge. Pa e pasahero ku sali esaki ta nifiká ku e tin ku paga total Ang 15,50 pa un destinashon lokal i Ang 63,10 pa un destinashon internashonal. Pasaheronan di edat di 60+ of menor di 12 aña ku ta residente di Antias Hulandes of Aruba i ku tin un destino lokal ta paga Ang 10,50. Muchanan bou di 2 aña no ta paga.
E motibu ku lo introdusi e service charge kuminsando 1 desèmber 2008 ta ku aeropuerto lo usa e sistema nobo AirportConnect CUTE. CUTE ta para pa Common Use Terminal Equipment. CUTE ta un sistema na e balinan di check-in ku tin un uso komun pa e aeroliñanan. Ku e uso komun kada aeroliña por usa kualkier di e 12 balinan pa check-in ku tin na aeropuerto Flamingo. Kontrario na e sistema aktual kaminda ku balinan di check-in dediká ta ser usá solamente pa un aeroliña partikular i no por wòrdu usa pa otro aeroliñanan.
Ku esaki ta logra mas fleksibilidat i ta subi e kapasidat pa prosesá pasaheronan. Di e forma aki un miho servisio ta wòrdu duná na e pasheronan ku ta sali. Banda di esei ta instala tambe komo parti di e sistema di CUTE un Flight Information Display System, kaminda pasaheronan por haña informashon aktual di oranan di yegada i salida i e status di buelonan.
Introdukshon di CUTE na Aeropuerto Flamingo ta nifika un modernisashon importante pa asina aeroliñanan por atende di un forma mas rapido i efisiente, mehorando asina e komodidat di e pasahero.

 

Bureau Telecommunicatie & Post a habri ofisina na Bonaire.
Bureau Telecommunicatie & Post (BTP), ku ta e regulador di telekomunikashon den Antia a habri un ofisina nobo i sofistiká na Boneiru. Esaki ta parti di e maneho pa ekstendé nan servisionan. Minister di Tráfiko i Telekomunikashon, Ir. Adriaens, ku ta e mandatario responsabel pa BTP huntu ku e direktor di BTP, Sr. De Canha a hasi apertura di e ofisina na Kralendijk. Esaki a tuma lugá dilanti diferente personanan ku ta laborá den e sektor di telekomunikashon. Promé duna esnan presente un bista paden di e ofisina, pastor a bendishoná e ofisina ku awa bendita.
Telekomunikashon a bira un elemento ku a penetrá den nos bida diario. Pueblo ta eksigí ku tin un instansha pa hasi e kontròl i inspekshon nan nesesario pa mantené kalidat di e servisio nan ku tur e provedor nan di telekomunikashon ta duna.
“Siendo un isla chikitu, Boneiru ta kana dilanti riba e tereno di telekomunikashon en komparashon ku diferente isla nan den Antia. BTP a hunga un ròl importante pa sostené e kambionan teknológiko aki na Boneiru i nos ofisina lo sigui sostené i fasilitá implementashon di esaki nan”; señor De Canha a añadí, despues di a ilustrá ku diferente ehempel ku Boneiru a marka pouta den e sektor di telekomunikashon.
Durante su diskurso Minister Adriaens a para ketu kon komunikashon tabata; ku 10 aña pasa no tabata tin kabel entre Kòrsou i Boneiru, kon karu preisnan pa uzo di selular tabata i no papia mes di internet. Aunke tabatin hopi resistensia, awendia dor di determinashon kambionan grandi a tuma lugá i resultado di esaki nan ta visibel.
Ku binida di internet frontera nan a disparsé i for di bo kas bo por komuniká ku henter mundu. Resistí e kambio nan ku internet ta trese kuné, ta nifiká resistí desaroyo di nos mucha nan, di nos komunidat i di nos isla nan. Esaki no ta un opshon sigun e mandatario. “Tur hende mester ta konektá” ta forma parti integral di e vishon di Minister Adriaens. Importante ta si ku internet mester ta pagabel i di bon kalidat pa kada kas por tin akseso na internet.
Sr. De Canha a yama danki na diferente mandatarionan Boneriano ku den pasado a yuda pa establesé BTP i nan presensia na Boneiru. “Nos lo keda duna servisio na tur e asina yamá islanan BES”; señor De Canha a sera su presentashon.
Minister Adriaens a finalisá bisando: “Nos pueblo nan durante aña nan a komuniká ku otro i maske nos paisnan kambia di struktura estatal komunikashon entre pueblo nan lo keda i ku uzo di internet esaki lo wòrdu fortalesé i nos lo sigui pasa frontera nan”.

 

Warwaru ta okashona basta daño na entrada di Washington Park.
Awe mainta trempan un warwaru a okashona bastante daño na entrada di Washingotn Park. E parti kaminda e eskeleto di e bayena, proyekto di Bonai ta buta a haña mas daño. E dak a keda destrui por kompleto. Riba e potrètnan por haña un bista di daño.

Primo Bernabela i Diana Winklaar ta risibi premio Chapi di Lucha.
Djaluna 10 di november a tuma luga na Sentro di bario Nikiboko pa di seis aña konsekutivo e konmemorashon Chapi di Lucha. Na e okashon aki a kondekora Primo Bernabela i Diana Winklaar. Na e okashon aki tabatin poesia i tambe diskuros di diputado di Kultura Martsa Silberie ku a trese padilanti ku e premio Chapi di Lucha ta ilustra ku den nos komunidat tambe tin hende ku nos por ta orguyoso di dje i ku ta duna ehempel ku hopi mas por sigi.

Riba e potret por mira Primo Thode i Diana Winklaar huntu ku Gezaghebber Thode ku tambe tabata presente.

 

A kuminsa ku Projekto Detentie Kapasiteit BES Eilanden.
Den e projekto Detentie Kapasiteit BES eilanden hulanda ta bai drecha e parti penitensiario aki na Boneiru i a kuminsa hasi esei dor di manda sosten den forma di empleadonan ku ta traha na hulanda den e ramo aki. Den nan tin antiano tambe i kada 6 luna lo bin otro grupo. Esaki segun Josefien Bakhuis representante di Minister di Hustisia. Diesnt Justitiele Inrichtingen di Hulanda ta kuminsa for di awor ku trabounan aki na Boneiru ku lo kulmina ku un prison nobo na plantage Aruba. Mas aleu segun Josefien Bakhuis, despues di e sosten di hulanda lo bai rekluta hendenan aki na Boneiru mes pa hasi e trabou. Loke ku a wanta e trabounan aki te ainda ku Antia mes no a hasi nan ta e parti finansiero pero awor hulanda ta soru pa esaki. I ta spera ku e instituto di Boneiru lo ta un modelo pa demas islanan. Segun Leo van der Meulen lider di e proyekto e tin 2 luna trahando aki na Boneiru i ta kontentu ku e soten ke ta hajando. Aworaki tin 13 trahado di Boneiru ku e ultimo 3 pa 4 anja a drei kas di detenshon i 20 trahado di hulanda ku ta dunando sosten. Lo duna les na e trahadonan lokal, i ta trahando tambe na e kas di detenshon kaminda aworaki detenidonan por traha 4 ora pa dia i lo hinka un miho struktura den otro. Su trabou ta pa pone tur kos manera mester ta den 2 pa 3 aña i esaki ta parti den renoba i ekspande kas di detenshon, traha un prison nobo i profeshonalisa e trahadonan di prison.

 

Farienne Dortalina i Channethon Jansen, Miss i Mister Modelo Boneiru 2008
Djasabra 8 di November 2008 den sporthal kompletamente yen di hende a tabatin elekshon Miss y Mister Modelo Bonaire 2008 organisa pa A.D. Produkshon. E partisipante nan mes tabatatin 3 presentashon oficial y un no oficial kual tabata e apertura ku tabata masha bunita mes estilo di The Golden Age Of The Pharahos. Tur e partisipante nan a lusi enormemente y a duna e kuerpo di hurado dolor di kabes. E resultado a keda den e kategoria di mister. Yohan Chal di kauter Finalista Mister Modelo Bonaire 2008, Joshua Carter Terser Finalista Mister Modelo Bonaire 2008 y alabes Mister Interview Bonaire 2008. Archuendro Finies Segunda Finalista Mister Modelo Bonaire 2008 y alabes Mister Jogging Bonaire 2008., Kawei Yan Prome Finalista Mister Modelo Bonare 2008 y alabes Mister Popular Bonaire 2008, Mister Internet Bonaire 2008, Mister Fotogeniko Bonaire 2008. Channethon Jansen Mister Best Body Bonaire 2008, Mister Popular Model 2008 y Mister Modelo Bonaire 2008.

Den e kategoria di e Missnan; Chelsey Domacasse Miss Djoli y alabes Miss Popual Model, Victoria Melaan Miss Dinamika, Miss Internet Bonaire 2008. Ruthvianca Josephia Miss Simpatika, Nizaira Martis Tercer Finalista Miss Modelo Bonaire 2008, Kathry Perez, segunda Finalista Miss Modelo Bonaire 2008. Johana Mata prome finalista Miss Modelo Bonaire 2008 y albes Miss Interview 2008.Farienne Dortalina Miss Modelo Bonaire 2008 y alabes Miss Best Body , Miss Popular 2008 y Miss Fotogenika Bonaire 2008.

 

‘Barracudas Swimming Club’ a hasi bon papel na Aruba.
Den fin di siman di 24 pa 26 di òktober último e klup di landamentu ‘Barracudas Swimming Club’ a partisipá ku 15 landadó na e ‘7th Aruba Dolphins Invitational 2008’ na isla hermana Aruba. Durante di e enkuentro aki nos hóbennan di Boneiru a hasi un hopi bon papel, konkistando e di tres puesto komo ekipo den klasifikashon general. Tur e hóbennan landadó a sa di gana puestonan den e promé 8 finalistanan.

Aki ta sigui nòmber di tur ku a gana medaya durante e kompetensha na Aruba: Ryda -Luz Emer, Mikel Schreuders, Kaile Finies, Tirzah Richards, Alejandro de Lima, Asdrubal Marcano, Sue-Ellen Richardson i Diorella Cicilia. Na momentu ku nan a yega bek for di Aruba diputado Nicolaas a bai risibí nan pa duna nan un elogio pa e bon trabounan prestá. El a mustra e hóbennan ku deporte sigur ta yuda nan den nan desaroyo personal i tambe profeshonal den futuro.

 

Antia 25 aña miembro asosia di Unesco
26 di oktober ultimo a rekorda ku 15 aña pasa Antia a bira miembro asosia di e organisashon mundial Unesco. Kada isla den Antia a duna atenshon na e hubileo aki dor di tene un anochi kultural i ayera tuam luga esun aki na Boneiru den kompleho deportivo. E anochi tabat unu varia ku diferente presentashon i invitadonan spesahl di e diferente islanan di Antia ku ta forma e komishon nashonal di Unesco Antia.

 

Selebrashon speshal na Parokia San Bernardo; 60 aña misa nobo.
7 di november 1948 a konsagra misa nobo i ayera a rekorda esaki ku un selebrashon ku bishita di Pastor Daniel Szpila for di Aruba ku a traha kasi 14 aña den e parokia di Playa i ku a presidi e Santu Sakrifisio di misa. Despues tabatin okashon pa felisita i partisipa na un Brindis.

 

Plan di akshon pa awa sushi ta nesesario pa salba koralnan.
Kolegio Ehekutivo riba prposishon di diputado Anthony Nicolaas enkarga ku maneho di medio ambiente i naturalesa, a baio di akuerdo ku e asina yama plan di akshon na awa sushi. For di e plan aki ta sali na kla ku tin mas nutriente den elamn rondo di Boneiru ku ta salu pa nos koralnan. Investigashon ku Stinapa i Sekshon di Maneho i Medio ambiente i Naturalesa a hasi ultimo añanan ta mustra ku e kantidat di nitrogeno den nos laman ta 0,01 miligram pa liter. Esei ta nifika ku nos refnan di koral ta den zona di peliger ya ku kantidat mas haltu den laman na otro partinan den Karibe ya a destrui refnan di koral. Na 2012 lo bin un sistema di kloaka i un instalashon pa purifikashon di awa sushi. Pero e por resulta muchu lat i ta pesei den e plan di akshon pa awa sushi lo bai saka mas tantu awa sushi for di e zona banda di nos kostanan. Esaki por keda transporta pa LVV ku 3 of 5 truk pa chupa awa. Aya lo konstrui un instalashon di purifikashon temporal i simpel pa 150.000 meter kubiko di awa sushi pa aña. Un waterschap di hulanda a pone e diseño di e instalashon temporal na disposishon. E gastunan total ta ser kalkula riba 850 mil Euro. E plan aki por yuda bon tambe bon tambe despues di 2012 pa kolekta awa pretu di berput i tankinan septiko mas parti paden di Boneiru i transporta esaki pa LVV. Ta e intenshon di kolegio ehekutivo pa pidi gobiernu hulandes pa yuda finansia e plan di akshon aki.

 

Na opinion di Demokrat riba WOLBES: Kompetensinan di gezaghebber ta hole 'estado polisial'.
E kompetensianan ku gezaghebber ta bai haña den e kuerpo públiko nobo ku ta bai drenta na vigor pa e islanan BES ta hole estado polisial. Esaki Aliansa Demokrátiko Boneriano ta trese dilanti den un nota ku nan a traha riba e konsepto di WOLBES. E kompetensianan ku gezaghebber ta bai haña ta bai demasiado leu, segun e frakshon.
Aliansa Demokrátiko Boneriano ta kuestioná den e konsepto di WOLBES riba mesa e echo ku ámtenarnan no por okupá funshonnan di gobernante den e kuerpo públiko di islanan Boneiru, St. Eustatius i Saba. Si nan ke okupá tòg funshonnan di gobernante, nan mester stòp di traha pa gobièrnu. E konsepto aki ademas no ta regla pa un miembro di Konseho Insular haña un kompensashon finansiero pa su trabounan, sea ‘part-time’ òf ‘full-time’, pa asina por kria su mes i su famia.
Mirando e eskala chikitu di Boneiru no ta fásil i simpel pa un ámtenar asina haña un sírkulo di trabou ku ta kuadra ku su preparashon. Esaki kontrario ku Hulanda, kaminda ámtenarnan por ehèmpel por bai traha na un munisipio besiña, miéntras ku nan ta funshoná komo miembro di Konseho Munisipal den nan mes munisipio.
Tambe frakshon di Aliansa Demokrátiko Boneriano ta elaborá riba e kompetensianan di gezaghebber pa por drenta un kas sin pèrmit di e habitante den kaso di supervishon riba kumplimentu òf investigashon di un kaso i violashon di lei i pa, den kaso ku e ta na interes di mantenshon di órden públiko, disidí ku ta nesesario pa pone supervishon hasiendo uso di kámara den un lugá públiko. Demokrat ta haña ku esaki ta kontra derechonan fundamental i kontra e derecho riba protekshon di e privasidat di siudadanonan.
Na opinion di Aliansa Demokrátiko Boneriano, aki ta trata di kompetensianan ku ta bai muchu leu i no por mantené e stipulashonnan aki den e forma ku a presentá nan. Esaki ta parse un ‘estado polisial’.

 

Sueldo minimo ta subi ku 15% entrante november.
Despues di un reunion entre Gobièrnu di Teritorio Insular di Boneiru i stakeholdernan riba tereno sosial ekonómiko a yega na e fecha di 1 di novèmber 2008 pa hisa sueldo mínimo.
E sueldo mínimo aki na Boneiru aktualmente ta NAfl. 6,27 i lo subi te NAfl. 7,21 pa ora pa luna basá riba 40 ora pa siman.

A skohe pa 1 di novèmber pasobra esaki ta un fecha mas serkano, efektivo i real, sin mester kana e trayekto mas kompliká di forsa retro aktivo. Staten ta laga kada isla liber den esaki.

E oumento di sueldo mínimo ta mara na diferente faktor manera entre otro:
- e ekonomia di Boneiru a krese di un manera struktural i na un nivel supstansial e delaster añanan;
- tambe preisnan di konsumidó speshalmente ora ta trata di kuminda a subi drástikamente e delaster añanan,.
- pa garantisá un desaroyo ekonómiko duradero mester tin partisipashon optimal di henter e poblashon, pues tambe di esnan ku ta gana sueldo mínimo i ménos.
- subiendo e sueldo mínimo esaki ta un empuhe positivo pa produktividat di labor.
- subiendo e sueldo mínimo ku un porsentahe supstansial di 15% ta pèrkurá ku esnan na e nivel mínimo tambe ta disfrutá di e desaroyo ekonómiko.

Faktornan ariba menshoná ta pone ku preisnan no nesesariamente mester subi komo konsekuensha di e subida di sueldo mínimo di 15% entrante di 1 di novèmber próksimo. Por bisa ku ekonomia ta sufisiente fuerte pa preisnan keda stabil i preisnan stabil na nan turno ta un influensha positivo pa un desaroyo ekonómiko duradero. Por bisa ku subida di sueldo mínimo ta bon pa tantu trahadó komo invershonista.

 

Diputado Elhage no ta dispuesto pa sigui mas den funshon.
Burney el Hage lo no keda den e funshon di diputado. Esaki ta informashon ku nos tin tokante e desaroyonan den seno di partido UPB. E susesonan di siman pasá kaminda ku e miembro di Konseho Insular di e partido, Anthony Nicolaas, tabatin diskushon ku e diferente miembronan prominente di e partido i ku e lider politiko di e partido Ramonsito Booi. Durante e situashon aki diputado el hage tabata na Merka na e bolsa di DEMA i na momentu di su regreso den fin di siman e tambe lo djoin e grupo di UPB ku tabata reuniendo tokante e situashon.

Segun tantu Booi komo Nicolaas a bisa siman pasá e situashon ta bon bek den partido i Ramonsito Booi a bisa ku te ku fin di aña lo no tin kambio den funshonnan di e partido.
Pero informashonnan riba kua nos ta dispone ta indiká ku Burney el Hage a partisipá na e lider politiko di UPB ku e no ta dispuesto mas di keda den funshon di diputado.
Aparentemente e susesonan di siman pasá ta e motibo di esaki.
Mientras tantu segun nos informashonnan e diputado a baha ku fakansi. Burney el Hage no a entrega retiru.
Nos a buska kontakto ku e diputado ayera nochi i e kontesta riba nos pregunta tabata ku e no tin komentario.

Burney el Hage a fungi den e gobiernu anterior komo diputado despues a bai bira minister na aña 2006. Dia 2 di yuli 2007 ela bira diputado bèk pa partido UPB. El Hage ta diputado fuera di Konseho Insular, pues e no ta miembro di e konseho.

 

Ladronisia ta karakterisá kriminalidat na Boneiru.
Di fin di mei pa fin di yüni 2008 Ofisina Sentral di Statistik (CBS) a kondusí un enkuesta di víktima na Boneiru, Kòrsou i Sint Maarten.

E resultadonan prinsipal pa Boneiru ta:

- Di e respondentenan di 16 aña bai ariba 72 porshento a yega di bira víktima di un delito. Den e 12 lunanan anterior na e enkuesta di víktima 27 porshento a bira víktima. Na 1995 58 porshento a yega di bira víktima i 30 porshento a bira víktima den e 12 lunanan promé ku e investigashon tuma lugá.

- E delitonan ku mas a resaltá, ta kiebro, ladronisia for di den kurá i pòrch, ladronisia for di den outo i di piesa di outo.

- Den 39 porshento di e kasonan e víktimanan a hasi denunsia di e delito na polis. Na 995 esei tabata 50 porshento.

- E motibunan ku mas e respondentenan ta menshoná pa no hasi denunsia ta: polis lo no hasi nada n’e kaso, polis lo no por a hasi nada/falta di prueba, kaso no ta sufisiente serio/no tabatin pèrdida/kos di mucha, persona mes a solushoná e kaso/konosé e persona ku a kometé e delito.

- Di esnan ku a hasi denunsia, 33 porshento a bisa di ta satisfecho ku e esfuerso di polis. Kompará ku 1995 (43%) esei ta un bahada ku 10 punto porshento.

- 35 Porshento di e respondente a duna di konosé ku nan tin sintimentunan fuerte te hopi fuerte di ansha i intrankilidat. Kontrali na 1995 (62%) esei ta hopi mas abou.

 

Wayaká, Pal’i Kalbas i Watapana kandidato pa palu nashonal di Bonaire.
E tanda preliminar di elekshon di e palu nashonal di Bonaire a finalisá. Algun sentenáres di persona a vota. E tres palunan ku a haña mas tantu voto ta den sekuensia voluntario: Wayaká, Pal’i Kalbas i Watapana òf Dividivi.
E elekshon di e palu nashonal di Bonaire a tuma lugá demokrátikamente pa e populashon di Bonaire. Djaluna 20 i djamars 21 di òktober tur hende por a duna su voto via telefon. Via yamada den korant i via emisoranan di radio popular a hasi yamada na públiko pa partisipá na e tanda preliminar. Den e tanda aki públiko por a skohe for di un lista di 24 palu. Tabatin dos liña di telefon na disposishon. Hóbennan di Jong Bonaire, ku asistensia di empleadonan di Gobièrnu i STINAPA Bonaire a registrá tur e votonan.
For di e lista di 24 kandidato públiko a vota pa 14 palu: Brasia, Kadushi, Kibrahacha, Pal’i Mangel blanku, Pal’i Boneiru, Pal’i Kalbas, Pal’i Kui, Pal’i Lele, Pal’i Sia blanku, Pal’i Sia Kòrá, Pal’i Taki, Watakeli, Watapana i Wayaká. Di nan Wayaká, Pal’i Kalbas i Watapana a bira e palunan den tòp tres. Kuantu voto kada palu a haña eksaktamente nos no ta anunsiá pa esaki no por influensiá e siguiente tanda di e elekshon.

Formulario pa vota
Awor e elekshon ta kontinuá ku un tanda eskrito den kual mester vota pa un di e tres palunan ku ta keda kandidato. Fin di e siman aki lo sali formularionan di voto den korantnan lokal i den 4-Sale, ku ta parti via pòst na tur kas. Durante otro siman por vota anto ku e formulario akí pa e palu nashonal di Bonaire di djaluna 3 te ku djabièrnè 7 di novèmber. E sitionan kaminda lo tin buzon pa entregá formulario di voto lo keda anunsiá den kurso di e siman aki. E elekshon di nos palu nashonal di Bonaire ta organisá pa STINAPA Bonaire i Gobièrnu.

 

Interupshon den distribushon di koriente riba 25 i 26 oktober.
Despues di tur e problemanan ku WEB a wordu konfronta ku ne siman pasa a bolbe surgi problema djasabra i djadumingu mainta. E dos problemanan den e grid tabata kasi similar ku otro. Djasabra mainta e problema a presenta alrededor di 6:27 i djadumingu alrededor di 7:00. Durante di e problema aki e planta di TWR a bolbe sali for di servisio. Esaki a pone ku un gran parti di Boneiru a keda sin koriente. Djasabra tabatin indikashon ku tabata un kortsluiting den un kabel. Pero despues di a midi esaki nada malu no a wordu detekta. Djasabra mainta mester a warda kasi un ora prome ku a kuminsa ku e buskeda di e problema pa motibo di e awaseru fuerte ku tabata kayendo.
Djadumingu mainta a nota ku riba e mesun trayekto ku e problema a origina djasabra tabatin indicashonnan ku lo mester tabatin un otro problema. Na e momentu ey a disidi pa laga e besindario di Kaya Beticio Croes, Kaya Kanari i besindario afo pa hasi un chekeo intensivo. Aki por a enkontra algun sistema di protekshon ku lo por tabata origen di e problema. Despues di a kambianan a pone koriente bek alrededor di 12:30 den e barionan aki.
WEB tin fuerte sospecho ku e grid a wordu afekta dor di e awaseru fuerte ku a kai den e ultimo dianan ku a pasa. Ta normal ku por spera problemanan tekniko despues di awaseru i mal tempu.
Na e momentunan aki WEB lo sigui hasi lo maksimo pa sigui monitor e situashon pa asina minimalisa e inkonbenensia ku por surgi pa su kliente pa motibu di awaseru i mal tempu.

 

Pueblo di Boneiru a demostrá nan solidaridat ku e famia di Marlies.
Un kantidat di mil persona a marcha djaweps anochi mil meter for di e rotonde na Kaya Amsterdam te na e planta di WEB n.v. na Hato kaminda Marlies van der Kouwe a disparse luna pasá den mardugá di 20 pa 21 sèptèmber ultimo. Den silensio e pueblo di Boneiru a demostrá nan solidaridat ku e famia di Marlies. Na final di e marcha famianan i e pueblo di Boneiru a pone potret di Marlies, flor i bela na un palu.
Prome ku esei tabatin un seremonia den Jeugdhuis Jong Bonaire ku a resulta muchu chikitu pa e kantidat di hende ku a hasi akto di presensia.
Tabatin palabra di parti di famianan i tambe di gezagheber Herbert Domacassé.

 

Sospechoso prinsipal den e kaso di Marlies van der Kouwe, R.P. a atmití.
Fiskal David van Delft a partisipa ku e sospechoso prinsipal den e kaso di Marlies van der Kouwe, R.P. a atmití di a bai ku Marlies i a hasi algu ku ne. E fiskal no por a bai den mas detaye i a pidi prensa tambe pa tene pasenshi i laga e investigashon kamna su kaminda.

DNA ta konfirma identidat di Marlies van der Kouwe.
Despues ku e lokalisa e restunan mortal di Marleis van der Kouwe djabierne ultimo, djadumingu e institutoi di NFI a hasi un investigashon di DNA riba e restunan i nan a konfirma ku e restonan mortal ta di Marlies van der Kouwe. Kontinuando ku e investigashon ayera mainta a detene K.E.M. di 25 anja komo sospechoso ku su partisipashon den kitamentu di hende su libertat kontra su boluntat i a hasi investigashon tambe den dos kas. Ayera a termina ku e investigashon na e sitio ku a hanja Marlies nav der Kouwe. E mayornan di Marlies a bishita e sitio i a laga un buket di flor atras.

I huntu ku Kuerpo polisial nan ta hasi un petishon pa trata e luga na un manera digno. Tambe nan lo apresia si e pueblo di Boneiru laga un buket di flor atras na memoria di Marlies.

 

A enkontra e restonan mortal di Marlies van der Kouwe.
Di parti di kuerpo di polis i fiskal David van Delft nan a anunsiá djasabra durante un konferensia di prensa ku nan a enkontra e restonan mortal di Marlies van der Kouwe di 24 aña ku a disparse den e marduga di djasabra 20 pa djadumingu 21 di september. Bosero polisial Reggie Huggins a tradusí informashon ku fiskal van Delft a duna.

Click aki pa skucha Reggie Huggins.

Awe marduga tabatin un black-out.
Despues di tur e problemanan ku WEB a wòrdu konfrontá ku n’e den e último dianan, awe mardugá alrededor di 2:15 a surgi un interupshon den produkshon di elektrisidat na e dos plantanan di Hato i TWR ku a kondusí na un blackout total .
E promé indikashon tabata ku probablemente lo mester a surgi un problema tékniko na dieselgenerador B ku tabata den operashon na e planta di TWR. Esaki a trese ku n’e ku tur bario di Boneiru a keda sin koriente. Despues di a hasi un inspekshon rigoroso a logra pone e planta di Hato den korto tempu bek den servisio. Alrededor di 3:30 a logra pone koriente bek na e barionan di Antriol i Nrd. Saliña i Playa Pabou.
Na momento ku mester a pone e planta di TWR bek den servisio pa asina duna e otro barionan koriente, a bin konstatá ku tabatin problema tambe ku un di e switchnan di altá tenshon i e sistema di bateria. Despues di a kaba solushoná e problema aki a kuminsá pa pone koriente bek na e diferente barionan alrededor di 6:45 di mainta. Na e momento ei a bin konstatá ku e kabel ku ta perkurá pa duna koriente na Playa tabatin un korto sirkuito den dje. Analisando henter e problema aki bek mester bisa ku ta e korto sirkuito aki tabata e orígen di e blackout aki.
Pa mas o menos 9:00 tur e otro barionan manera un parti di Playa, Rincon, Tera Cora, Nikiboko, Republiek, Hato i Belnem a haña koriente bek.
Despues di a remediá e situashon aki a sigui ku e trabounan pa solushoná e defekto den e kabel ku ta perkurá pa duna koriente na Playa.
Apesar di e hecho ku e personal di WEB a traha di dia i anochi durante e último tres dianan ku a pasa, nan a hasi lo maximo pa solushoná e problema. WEB NV ta pidi su diskulpa pa e inkonbeniensia ku a surgi pa e kliente.

 

Team di kalamidat a hasi un bon trabou, segun gezaghebber Thielman.
Gezaghebber interino Eddy Thielman ta satisfecho kon trabounan i kordinashon di e team di kalamidat a kana durante di dianan ku mal tempu a pasa riba nos isla.
Gezaghebber interino sr. Thielman ta gradisí un i tur ku a pone man na obra pa evitá un situashon aun mas pió. For di momentu ku gezaghebber interino a aktivá e ‘Rampenstaf’ tabatin e situashon bou di kontròl i a kuminsá mesora ku e trabounan konforme operashon di e team i a mobilisá mesora pa duna asistensha kaminda tabatin problema.
Dañonan kousa dor di e mal tempu ta konsiderablemente haltu i awor ta momentu pa sòru pa tur kos ta na òrdu bek manera kustumber i repará e dañonan hasí. E parti ku mas a sufri daño ta e parti na kosta pabou. Na e parti aki e laman brutu a hasi hopi daño. Den e kaso aki, kamindanan ku a kibra, ophetonan bentá riba tera, palu i matanan ku a wòrdu tumbá dor e bientunan duru. Tur esakinan ta forma un peliger pa hende i pa tráfiko.
Remarkabel tabata ku apesar di tur e mal tempu ku nos a eksperenshá, nos aeropuerto Flamingo a keda operashonal i den bon kondishon.
Un apelashon ta bai na kualke persona òf instansha ku ke duna un man den limpiesa òf reparashon di dañonan esaki semper ta bon biní i esaki tin ku bai tambe den kordinashon ku instanshanan di gobièrnu.